Министерот за економија Крешник Бектеши денеска повтори декапоскапувањето на струјата ќе биде најмногу до 10 отсто, и покрај тоа што ЕСМ обави пред неколку дена дека доставиле понуда до ЕВН Хоум за повисока цена од 13,6 отсто од сегашната.
-Јас останувам на тоа што сум го кажал и ќе чекаме до крајот на месецот да видиме каква ќе биде одлуката на РКЕ. Ние сме ги направиле сите анализи, и не само јас како министер за економија и другите институции биле вклучени – енергетските компании како што се ЕСМ, ЕВН, МЕПСО и согласно нашите анализи останувам на ставот што сум го кажал. Нема да има зголемување повеќе од 10 отсто, рече Бектеши.
Тој прецизира дека првично не кажал 10 проценти, туку, вели, најмногу до 10 проценти, а тоа може да биде и нула, и еден и два, па до 9,99 отсто. 
Претходно, АД ЕСМ достави понуда до универзалниот снабдувач со електрична енергија ЕВН Хоум која изнесува 41 евро за мегават час електрична енергија што, пак, е за 13,6 отсто повисока од понудата за периодот јули-декември 2021 година.
Бектеши денеска зборуваше и дека веќе почнале да се изработуваат нови модели во делот на одредување на цена на електрична енергија со моделот на блок тарифи каде што, како што рече ќе ги поттикнат граѓаните да заштедат електрична енергија. Тие, според неговата изјава, би биле од јуни наредната година.
-Тие што се најранливи можеби ќе имаат и намалување во делот на електричната енергија од јуни наредната година, а тие што прават потрошувачка над еден мегават и повеќе од еден мегават што е многу, и тие најверојатно се многу богати семејства што трошат толку многу електрична енергија, за нив ќе се зголеми дополнително цената. Ова го зборувам за јуни имајќи во предвид дека двапати годишно ние носиме одлуки за утврдување на цената на електрична енергија, вели Бектеши.
