ВМРО-ДПМНЕ ќе поднесе кривична пријава против претседателот на Собранието Талат Џафери поради „свесно кршење на Уставот и законите“, за обраќањето на Џафери пред Комитетот за надворешна политика на ЕП на албански јазик.
Професорката и пратеничка од ВМРО-ДПМНЕ, Гордана Силјановска Давкова, на прес-конференција во Собранието рече дека со обраќањето, тој го прекршил Уставот преку своја лична интерпретација на одредбите на јазикот, како и дека за истото треба да одговара, а ја повика и претседателката на Уставниот суд да постапи по иницијативите за оценка на уставноста на Законот за употреба на јазиците.
-Претседателот на Собранието Талат Џафери го промовираше на меѓународен план јазичниот федерализам имено тој зборуваше на албански јазик, би сакала да упатам на уставното решение, односно на амандманот 5 од Уставот, Член 1 во кое јасно се вели дека на целата територија на Република Македонија и во нејзините меѓународни односи службен јазик е македонскиот јазик и неговото кирилско писмо, вели Силјановска Давкова. 
Таа посочи дека ставот 2 од истиот член од Уставот вели дека јазикот кој го зборуваат најмалку 20% од граѓаните исто така е службен јазик со неговото писмо, но во истиот член никаде не пишува дека истиот може да се употребува во меѓународните односи, што според Силјановска Давкова, Џафери „си го допишал Уставот преку своја лична интерпретација на одредбите за јазикот“.
Интерпелација за Џафери денеска најави Левица, а поддршка доби и од ВМРО-ДПМНЕ.
