Зголемен број на починати како и новозаразени лица забележал Институтот за јавно здравје во редовната неделна анализа која го опфаќа периодот од 15 до 21 март.
-Во овој период пријавени се 158 смртни случаи од 27 градови, што е 22,5 отсто повеќе во однос на минатата недела. Во однос на возраста, 135 лица биле над 60 години, 19 лица на возраст од 50-59 години, три лица од возрасната група 40-49 години и едно лице на возраст од 30-39 години, се наведува во анализата.
Во истиот период тестирани се вкупно 24.517 лица, со зголемување од 8,4 проценти во однос на минатата недела. 
-Регистрирани се 6.899 нови позитивни случаи од 35 градови во државата со зголемување од 26,4 отсто во однос на минатата недела. Најголем дел од регистрираните случаи се од Скопје – 3 441 лица или 49,9 проценти. Процентот на позитивност се движи од 23,4 до 32,3 отсто, просечно 27,9 проценти, што е 3 отсто повеќе во споредба со минатата недела, информира ИЈЗ.
Регистрирани се заболени лица во сите возрасни групи. Најзастапена е возрасната група на лица на возраст над 60 години. Она што е карактеристично за оваа недела е што најголемо процентуално зголемување во однос на претходната недела е забележано кај лицата 10-19 (33,1 отсто), 50-59 (32,1 отсто) и 40-49 (30,2 отсто).
Заклучно со вчера вкупно се вакцинирани 6.704 здравствени работници со прва доза од кои 4.002 со вакцината на „Фајзер“, а 2.702 со вакцината „Спутник 5“ и 2.572 со втора доза на вакцината на „Фајзер“.
