Февруари полека завршува, а вакцините ветени за овој месец ги нема во Македонија. До каде е работава, ќе дојдат ли?
Уверувањата дека ќе дојдат беа лично од премиерот Зоран Заев. Тој дури и кажа пред две недели дека малку само треба да се почека завршувањето на кинеската Нова година на 18 февруари. Тоа ветување беше охрабрувачко бидејќи четири дена пред неа беше и потпишан конкретен договор за набавка на 200.000 дози од оваа вакцина. Со неа, практично, требаше да стартува и помасовна вакцинација на граѓани во рамките на три определени групи.
Меѓутоа, еве, веќе изминува февруари, а од кинеските вакцини нема ниту најава дека се пакуваат и дека ќе тргнат кон Македонија. Објаснување до каде е испораката нема – ниту од премиерот, ниту од министерот за здравство. 
До кога ќе се чека не се знае. Исто како што не се знае до каде е испораката на 800.000 договорени дози од „Фајзер“, до каде е испораката на околу 30.000 вакцини на „АстраЗенека“ преку Ковакс-механизмот. Еве, сега се договара и набавка на 100.000 дози на руска вакцина за кои пак не се знае кога ќе бидат испорачани…
Единствено, што се соопштува е дека нашите власти се во „интензивна комуникација“ со производителите. Во таква ситуација, кога секојдневно почна да се зголемува бројот на новозаразени и учеството на британскиот сој на вирусот, граѓаните само се прашуваат: колку трае кинеска Нова година и пак ли е во прашање само некој докумет што фали за да пристигнат и останатите ветени вакцини?
