По повод 100 годишнината од раѓањето на Блаже Конески, Градот Скопје е во постапка за подигнување спомен-обележје пред неговата куќа на Водно.
Ова денеска го најави градоначалникот на Скопје Петре Шилегов на тркалезната маса „Разговори со Конески“ која се одржа во дворот на Институтот за македонски јазик „Крсте Мисирков“.
-Се радувам што Град Скопје со низа активности се вклучи во одбележувањето на овој наш значаен јубилеј. Ќе се обидам да набројам само дел од нив: финансиравме издавање на книга „100 песни на Конески“; ја поддржавме неодамнешната трибина во Културно-информативниот центар во негова чест, како што го поддржуваме и овој денешен собир; во тек е постапката за подигнување спомен-обележје пред куќата на Конески на Водно и, за крај, посебно сум горд што еден од најцентарските булевари веќе го носи името Блаже Конески. Со тоа барем малку му се оддолжуваме за неговото големо дело, рече Шилегов. 
