Денеска е забележан тренд на намалување на бројот на новодијагностицирани случаи со Ковид-19, истакна министерот за здравство Венко Филипче. Бројот на новозаразени од корона вирус како што рече тој е околу 1000 лица, што според него потврдува дека епидемиолошката крива е во континуиран пад.
Тој посочи дека притисокот во болниците е се уште голем со оглед на тоа што се уште има голема бројка на новозаразени со Ковид-19.
-Во сите јавно-здравствени установи согласно распоредите и прераспределбата на пациенти има слободни болнички кревети и во Скопје на Интерните клиники и во ковид центарот во Заводот за рехаблитација во Козле, како и во другите градови. Се прави прераспределба на пациенти од другите градови ако треба. Во овој момент се преоптоварени болниците во Куманово и во Битола и тоа на дневна основа го менаџираме, истакна Филипче. 
Според него вакцинацијата во Македонија се одвива добро, а доколку има потреба по 20 април повторно ќе се продолжат рестриктивните мерки.
Тој додаде дека кога ќе стигне поголема количина на вакцини тогаш и ќе се вакцинира, затоа што не сака да го земе редот на некој што има поголем ризик.
