Шинџи Вакаматсу и Имура Хидефуми, како и Јамада Таизо, кој е постар советник во Јапонската агенција за меѓународна соработка – ЏАЈКА, денеска одржуваат предавање на Машинскиот факултет во Скопје со цел да се споделат искуства и да се отвори дебата за проблемот со загадувањето на амбиенталниот воздух во земјава.
Пред предавањето, професорот Вакаматсу порача дека е потребен различен пристап за стационарните извори на загадување (домови и индустрија) и за мобилните извори на загадување (сообраќај и подвижна опрема).
-Кога количината на гориво што се користи во објектите стане голема, дозволеното ниво на емисија треба да биде построго. Особено важна е соработката меѓу властите и приватните компании, а неопходно е и воведување на технологии за филтрирање на оџаците, со што ќе се намали емисијата на штетни гасови. За мобилните извори на емисии, освен мерките против индивидуалните автомобили, подеднакво важни се и сообраќајните и логистички системи. За создавање на еколошки одржлив град, треба да се воведе безбеден и евтин јавен систем на транспорт, нагласува Вакаматсу. 
И во двата пристапи Македонија крахира: властите постојано тврдат дека нема недозволена емисија на отровни чадови од неколкуте фабрики, додека загаденоста на воздухот зборува друго. А за тоа ретко, односно речиси никогаш не сме слушнале дека е така, или пак дека некој од газдите одговарал.
Што се однесува до јавниот сообраќај за него скопјани барем сигурно ќе се сложат дека ниту е безбеден ниту пак е ефтин. И ако не е во метрополата, тогаш наградното прашање е како е во помалите градови?
Заклучокот е дека препораките на јапонските научници, несомнено се вистинските, впрочем и самите си знаеме што ни е маката. Но, разликата е во тоа што Јапонија открива проблем, наоѓа решение, па го применува, и тука е крајот. Ние стигнуваме до фаза два, наоѓаме решение, ама глумиме дека се применува.
