Неколку часа по затворање на избирачките места вчера почна славењето на опозицијата за победата на локалните избори. Гласачите јасно одлучија во вториот круг – довербата ја даваат на кандидатите на ВМРО-ДПМНЕ кои освоија градоначалнички места во 20 општини, Алијанса за Албанците – Алтернатива и Беса по две, и по едно градоначалничко место имаат освоено ДПА, ГРОМ и Коалицијата ЛДП-ДОМ. Владеачките СДСМ и ДУИ освоија по седум градоначалнички места.
Во вториот круг победи и независната кандидатка за градоначалник на Град Скопје Данела Арсовска, поддржана од ВМРО-ДПМНЕ и Коалицијата, независниот кандидат Максим Димитриевски во Куманово, и независниот кандидат во Дебарца Зоран Ногачески.
Со ова гласачите јасно дадоа до знаење дека во првиот круг на Зоран Заев не му дале жолт картон како што тој мислеше туку црвен. Доцна синоќа по се изгледа тоа го разбра и самиот Заев и си поднесе оставка од премиерската функција, но и од лидерската во поразениот СДСМ. Пред заминување тој изрази разочараност што мнозинството од народот ги избрал, како што рече, истите луѓе и политичари кои пред четири години во Парламентот сакале и тргнале да убиваат. 
Лидерот на ВМРО-ДПМНЕ пак, Христијан Мицкоски, синоќа порача дека партијата извојувала голема победа, по која ќе почнеле промените за подобра Македонија.
За потсетување во првиот круг од локалните избори ВМРО-ДПМНЕ освои 22 градоначалнички места, СДСМ девет, ДУИ две.
