Православните христијански верници денеска ги празнуваат големиот празник посветен на Преподобен Наум Охридски Чудотворец, најблискиот соработник на свети Климент, првиот словенски епископ. Тој бил и ученик на Светите Методиј и Кирил и еден од Петточислениците коишто најревносно соработуваа со овие словенски Апостоли. Во делото на просветувањето на Словените со евангелската вистина тој учествувал како учител, а потоа и како свештеник.
За животот и дејноста на свети Наум Охридски малку се знае, иако со свети Климент Охридски се најпознатите и најзначајни ученици на светите браќа Кирил и Методиј. Се знае дека учествувал во Моравската мисија и дека по смртта на Методиј во 885 година дошол во Македонија. Умрел во 910 година и наскоро по смртта бил прогласен за светец. Неговите ученици за него напишале житија и служба.
Свети Наум освен по црковната дејност е познат и како македонски средовековен писател и културен деец. Од неговите творби, за кои се претпоставува дека се повеќе, откриено е химнографското дело „Канон за аспотолот Андреј“, а се знае за уште други два канона напишани од него: „Канон на Архангел Михаил“, и „Канон за пренесување на моштите на Јован Златоуст“. Во житието на свети Наум се вели дека тој е брат на свети Климента. Некои истражувачи сметаат дека тоа се однесува на брат во духовна смисла – собрат, но повеќемина се убедени дека Климент и Наум навистина биле родени браќа. Не само затоа што свети Климент бил епископ, а свети Наум презвитер, а во православието епископ и презвитер никогаш не се нарекувале браќа, туку и поради некои други показатели. 
Во споменот на народот св. Наум останал како чудотворец кој го почитуваат и припадници на други вери. Десетина години пред заминувањето од овој свет Св. Наум го основал манастирот посветен на светите Архангели на Охридското езеро. Овој манастир е денешниот истоимен Св. Наум. Преподобниот Наум Охридски – Чудотворец има два празници, едниот е во зимскиот период и се празнува на 5 јануари/23 декември, а другиот во летниот период на 3 јули/20 јуни. Именден празнуваат: Наум, Наумче, Науме, Наумка…
