Медиумското покривање на изборната кампања за предвремените парламентарни избори во јули лани, забележително во полза на промоција на мажите – кандидати за пратеници и машкиот поглед и експертиза за случувањата околу изборите, додека кандидатките беа во сенка на своите колеги мажи, имаа помалку пристап до различните форми на промоција на нивните платформи и нивните профили и пораки остануваа анонимни, односно нечуени и невидени од јавноста, покажа истражувањето „Родот во изборната кампања 2020: Анализа на родовите прашања и начинот на прикажување и претставување на жените и на мажите во изборното медиумско претставување на националните телевизии“, на Агенцијата за аудио и аудиовизуелни медиумски услуги (АВМУ).
Во истражувањето што за АВМУ го изработи тим на Институтот за демократија „Социетас цивилис“ Скопје (ИДСЦС), анаизирани се вкупно 2.056 медиумски содржини: прилози во дневноинформативни емисии, интервјуа, дебати и спотови на платено-политичко рекламирање емитувани во периодот од 24.06 до 12.07.2020 година на националните терестријални телевизиски сервиси во земјата: МРТ 1 и МРТ 2, ТВ Алсат-М, ТВ Алфа, ТВ Канал 5, ТВ Сител и ТВ Телма.
Од вкупно 134 претставници на политички партии, 128 беа мажи, наспроти шест жени, а во дневно информативните емисии на изборни теми, како примарни субјекти се појавуваат 86 проценти мажи, наспроти 14 отсто жени. 
Квалитативната анализа на содржината на дневноинформативните емисии, меѓу другото покажала дека во девет прилози претставувањето на жените беше сексуално објективизирано, додека во шест прилози била забележана стереотипизација врз основа на родовите улоги претпоставени од општеството.
Родовата стереотипизација најчесто е присутна во платените политички реклами, особено во делот на грижата за семејството, храброста и херојството и професиите.
