Во изминатите 24 часа во ковид-центрите во Скопје се хоспитализирани рекордни 87 нови пациенти поради компликации од корона вирусот, соопшти денеска Министерството за здравство. Во соопштението се додава дека вкупно 686 лица сомнителни и потврдени на Ковид-19 се лекуваат на инфективните оддели во главниот град.
– Бројот на приеми во изминатите денови е зголемен и, утрово, до 8 часот, имало 90 слободни места, а се очекува во текот на денот, по направените исписи на оздравените пациенти, да се ослободат и дополнителни места, се наведува во информацијата.
Инаку, вкупната бројка на пациенти позитивни и суспектни на корона вирусот што се лекуваат на инфективните оддели во главниот град и во болниците во земјата е 1.720 и има околу 240 празни болнички кревети во ковид-центрите. 
Во последното деноноќие на интерните и на хируршките клиники имало 45 приеми. Во ковид-центарот во ГОБ „8 Септември“ имало 20 примени пациенти и 11 биле примени на Инфективната клиника во текот на вчерашниот ден, а во ковид-центрите на интерните и на хируршките клиники се лекуваат 316 пациенти.
Во ГОБ „8 Септември“ има вкупно 142 болни, на Клиниката за инфективни болести лежат 155 пациенти, а на Иститутот за белодробни заболувања кај децата во Козле има 38 пациенти. На Клиниката за детски болести има 8 деца позитивни на коронавирусот, а на ГАК има 9 позитивни пациентки. На Институтот за физикална медицина и рехабилитација има 11 болни.
