По вчерашната одлука на Владата, да ја продолжи кризната состојба на дел од територијата на државата за да се спречи транзитирање на мигранти, претседателот на државата Стево Пендаровски денеска ја врати војската на јужната и на северната граница, која вчера ја повлече.
Повлекувањето беше поради истекувањето на важноста на претходната одлука за кризна состојба (на 31 март), а поради блокадата на Собранието таа не беше продолжена.
Владата вчера на седница донесе нова одлука со која кризната состојба повторно се воведува до 30 дена, а е наменета за спречување на транзицијата на нелегални мигранти и за заштита од ковид. 
Кризната состојба на овие две граници е воведена од 2015 година и според неа војската заедно со граничната полиција се грижи да нема нелегални влезови на овие две граници.
Но, колку е можно стопроцентно да се спречат вакви нелегални велгувања на мигранти е друг проблем, а на тоа укажуваат секојдневните информации за фаќање на шверцери кои со комбиња и автомобили, а некои и во камиони пренесуваат лица главно од Блискиот исток, кои транзитираат низ земјава одејќи кон западните земји.
