Бројките кои ги објавува Министерството за здравство во врска со пандемијата – вриштаат како аларм. Особено загрижуваат бројките на починатите од корона вирусот.
Во изминатово деноноќие починале дури 30 заболени и со што бројката на вкупно починати стаса до 3.503 лица. Алармантно!
А, алармантно е во сите изминати денови, со таа разлика што бројот на починатите денеска беше најголем во споредба со изминативе десетина денови. За последните 10 дена починале вкупно 221 лице. 
Трендот е загрижувачи, како по бројот на починати така и по бројот на новозаразени лица. Во споредба со другите земји во балканскиот регион одамна сме при самиот врв. Споредено по бројот на умрени на еден милион жители во земјава од нас полошо стојат само неколку земји. Додека во Македонија на еден милион жители има 1.667 умрени лица, во Црна Гора тој број изнесува 1.923, во Словенија 1.912, БИХ – 1.768… Останатите земји – Србија, Грција и Хрватска имаат подобра црна статистика од 570, 725 и 1.416 умрени граѓани на милион жители.
Се прави ли доволно за да се избегне понатамошен раст на црните бројки? Поголема сериозност треба и кај власта и кај здравствените институции и кај самите граѓани со поревносно почитување на мерките. Голем дел од граѓаните мора да е повнимателен и поодговорен.
И граѓаните по овие бројки излегуваат со свои реакции, но и прашања:
-Страшни се бројките, треба сите ние да внимаваме повеќе. Но не треба ли и пописот да се одложи? Како тоа ние граѓаните сме биле недоволно внимателни, ама власта внимавала кога ќе ни пушти попишувачи дома, е еден од коментарите на социјалните мрежи.
