Усно најавената оставка од премиерот Зоран Заев нема да биде и писмено доставена до Собранието. Лидерот на СДСМ ќе почекал „додека не се стабилизира ситуацијата во државата“. Вака одлучиле највисоките органи на СДСМ, оставките да бидат одложени на неопределено време. Ова го објасни самиот Заев кого по изборите го снема во јавноста.
– Уште еднаш напоменувам вечерта на 31 октомври кога ги објавив оставките од двете функции реков останувам периодот за да се посветам, да помогнам во одржувањето на парламентарното мнозинство, ако може тоа парламентарно мнозинство и да порасне. Деновите се пред нас, секако тоа ќе го дознаеме сите, изјави Заев.
Што значи тоа неопределено време, дали оставката ќе мирува целиот мандат или можеби само по идната пролет? Не беше разјаснето и што според Заев е „стабилизирање на ситуацијата во Македонија“ по што ќе ја активира оставката? 
Инаку, по завршувањето на состаноците на партиските органи, Заев на прашањето како е да се биде 10 дена без медиуми одговори дека „слободата е убава работа“.
