Американската спринтерка Шакари Ричардсон била позитивна на марихуана на американските олимписки квалификации поради што може да остане без настап на Игрите во Токио.
Дваесет и едногодишната Ричардсон победи во финалната трка на 100 метри на американските квалификации што се одржаа минатиот месец, обезбедувајќи пласман на претстојната Олимпијада во Токио. Таа во април годинава стана шестата најбрза жена во светот, откако патеката на митингот во Флорида ја истрча за 10.72 секунди.
Марихуаната е на листата забранети супстанции на Светската антидопинг агенција (WADA), а позитивен тест може да доведе до суспензија од еден месец до две години. 
Првата реакција на Ричардсон беше: „Јас сум човек“, напиша таа на Твитер.
