Изминатиот викенд, во Врање се вакцинирале 927 македонски државјани, или досега во овој град со првата доза се вакцинирани 2.032 наши граѓани, објавија српските здравствени власти.
Вакцинацијата е без претходно закажување, а единствено што со себе треба да носат граѓаните е важечки документ за лична идентификација.
Освен во Врање, македонските државјани без закажување може да се вакцинираат и во Здравствениот дом во Ниш. За граѓаните се достапни вакцините на „Синофарм“, „Астра Зенека“ и „Фајзер“, додека „Спутник В“ им се дава само на граѓаните што добиле покана од Е-управа. 
Од податоците од пограничните служби, во саботата до пладне околу 2.500 наши граѓани заминале за Србија.
Претходно, според неофицијалните податоци во Србија се вакцинирани над 15.000 наши граѓани. Податоците се неофицијални, бидејќи српските власти се уште не ги испратиле до македонските власти.
Министерот Филипче најави дека се планира отворање посебен пункт за ревакцинација на нашите државјани кои првата доза ја примија во Србија, а како опции се Врање и Ниш. Сите тие се вакцинираа со „Астра Зенека“ која кај нас се дава само на лица постари од 60 години.
