Во првата недела на овој месец регистрирани сe 155 нови позитивни случаи од 21 град во државата, што е намалување од 29,5 отсто во однос на минатата недела, покажуваат податоците од неделниот извештај на Институтот за јавно здравје.
Најголем дел од регистрираните случаи се од Скопје, а заболените се од сите возрасни групи. Сепак, најзастапена е возрасната група над 60 години, потоа од 50 до 59, од 40 до 49, од 30 до 39 и од 20 до 29 години. Најмал број е регистриран кај децата на возраст до девет години и од 10 до 19 години.
Пријавени се 13 смртни случаи од шест градови, што е за 45,8 отсто помалку во однос на минатата недела. Во однос на возраста, девет лица биле над 60 години, три лица на возраст од 50 до 59 години и едно лице од 40 до 49 години. 
Во оваа недела тестирани се вкупно 19.672 материјали, што е зголемување од 9,1 отсто во однос на минатата недела.
