Во Општина Чаир денеска беше означен почетокот на работите за целосна реконструкција на водоводната мрежа на четири улици од населбата Серава: „Јахја Паша“ („Солунска “) и нејзините кракови, „Ковачка“,„Рифат Бурџевиќ“ и „Кумбара“.
Денеска таму беа министерот за животна средина Насер Нуредини и градоначалникот на Чаир, Висар Ганиу.
– Нашиот ангажман во оваа општина не завршува тука и во наредниот период ќе продолжиме со реализација на проекти за водоснабдување и одведување на отпадни води. Веќе е изработена индикативна листа на можни проекти за кои се започнати преговори со Европската Инвестициска Банка за обезбедување на кредит, изјави Нуредини. 
Ганиу пак објави дека се обезбедени и над 1 милион евра за населбата Серава, преку алокација на средствата од ТАВ, со кои во рок од 3-4 месеци целосно ќе се реконструира водоводната и фекалната канализациона мрежа на многу други улици на ова населба, каде живеат над 20 илјади жители.
Тој потсетил дека пред неколку недели беа обезбедени и 650 илјади евра од Проектот за подобрување на општинските услуги – МСИП 2, за реконструкција на водоводната мрежа, фекалната и атмосферската канализација во 6 улици од населбата Дижонска.
Убаво е кога локалните власти се грижат животот на жителите да се осовременува, но неразбирливо е што за нормална водоводна и канализациска мрежа се говори во 21 век, во општина во главниот град на држава која е кандидат за членство во ЕУ.
И посебно што, вакви работи се прават во пресрет на локални избори.
