Општината Карпош во соработка со невладина организација спровеле истражување за загаденоста на воздухот во затворените простории во училиштата. На ова се одлучиле бидејќи за цело време фокусот на вниманието е загадениот воздух, но надвор, на отворено. Во рамките на проектот биле организирани и предавања за подигнување на јавната свест кај учениците за тоа што значи да се седи во затворен простор при загаден воздух.
Добро е што се мисли за здравјето, особено на децата. И добро уште од мали нозе децата да научат како се заштитува околината. Ама проблемот е кај татковците, не е кај учениците, особено кај градските татковци кои пари трошат главно за вакви и слични проекти. Народот вели, а и очекува, дела, а не само зборови.
Добро е што Опшштината Карпош мерела колку се загадени и загрозени училниците, а што кога ќе излезат во школскиот двор? Е дури таму е вистинската закана за здравјето. Па, уште и трчаат, вежбаат… а надлежните од што мораат го мерат нивото на ПМ2 и ПМ10 честички. Граѓаните исто така си купија мерачи и добро знаат каков е квалитетот на воздухот, но имаат право да знаат и кој загадува и колку. А, имаат и уставно право на чист воздух. 
На јавноста и е доста од мерење, таа очекува акција и санкции, зашто скопјани се среќни само ако дувне ветер оти само тој остана нивен сојузник.
