Ако се констатирало дека во иднина е неопходна нова регулатива за Водно, тогаш ќе се дискутирало – министерот за животна средина им „удри“ шлаканица на граѓанските активисти од „Го сакам Водно“ и „О2 Иницијатива“, но и на сите скопјани кои ревносно се бореа да се зголеми заштитата на планината со специјален закон за Водно. Ова, народски кажано, значи дека за околу 40 проценти од планината нема ред и поредок, па богаташите блиски до оваа или онаа власт – зависно како ќе ротира политиката, ќе можат слободно да си градат и да ја соголат Водно.
-Министре Насер Нуредини, зарем веќе имате заземено официјален став на Министерството?! Зарем сета дискусија и јавна расправа е само про-форма“, прашуваат „Го сакам Водно“ и „О2 Иницијатива“. Инаку, 38 граѓански здруженија и организации до Владата пред десетина дена доставија барање за итно стопирање на започнатите постапки за прогласување на Водно за Заштитен предел. Тие побараа итно пристапување кон изработка на посебен закон за заштита на парк-шумата Водно, но залудно.
Иако додека беа гласни, пред самата јавна расправа, Нуредини им ветуваше дека ќе бидат земени предвид сите забелешки, откако заврши се, тој сега смени мислење па вели неточно било оти претходниот статус на заштита на Водно бил од повисоко ниво. 
Сите здруженија, па и бројни експерти со години предупредуваат дека уништувањето на Водно може да биде фатално. Не само што како природно богатство и место за релаксација ни е потребно, ами и од животно загрозувачки причини бидејќи земјиштето е ровко и водено, па лесно би можело да го „поклопи“ Скопје, ако се излизга. Но, се чини, некому му се најважни други работи…
