Министерот за надворешни работи Бујар Османи денеска на прес-конференција и лично ја потврди информацијата која вчера ја објавија некои медиуми на албански јазик, дека минатата недела дипломат од Руската Амбасада во Скопје е прогласен за персона нон грата.
-Бидејќи информациите од овој карактер се доверливи, само ќе кажам дека Министерството за надворешни работи, во рамките на своите надлежности, ги презема сите соодветни мерки и активности согласно виенската конвенција за дипломатски односи со цел да ја заштити националната безбедност на Македонија, како и безбедноста на нашите сојузници, изјави денеска Османи на прес-конференцијата.
Медиуми на албански јазик, повикувајќи се на извори од Министерството за надворешни работи, објавија дека минатата среда повторно бил депортиран заменик -военото аташе А. Шевченко, кој презел несоодветни дипломатски дејствија. 
Во мај годинава, еден руски дипломат во земјава беше прогласен за персона нон грата, а како причина за протерување на дипломатот се посочуваат активности што не се во согласност со однесувањето кое се очекува од странски дипломат што служи во земјата домаќин.
Претходно, рускиот амбасадор во Скопје, Сергеј Александрович Баздикин, бил повикан во македонското Министерството за надворешни работи, каде што бил известен за тоа.
Потоа како реципрочна мерка беше протеран еден наш дипломат од Амбасадата во Москва.
