Се бројат деновите пред почетокот на Европското првенство во Фудбал. Сите со радост ги чекаме настапите на репрезентативната чета со Горан Пандев како капитен.
Но, денеска се бројат и минутите поминати по презентацијата на новите дресови за репрезентативците по кои се искажа незадоволството од многу граѓани. Имено, поминаа не повеќе од 50-минути откако јавноста ги виде трите верзии на дресот кој ќе го носат нашите фудбалски мајстори на Европското првенство, а веќе има негодување, па дури и најава за потпишување на петиција со која ќе се бара дресовите да бидат во вообичаените црвено-жолти бои, а не како новопрезентираниот – бордо.
-Македонија на ЕП со старите дресови, ова барање многу брзо се шири по социјалните мрежи. 
Граѓаните се незадоволни што го нема сонцето на дресот, но и прашуваат дали на него ќе пишува – Македонија.
-Ова е дресот на “нашата земја”. Каде е тој што беше на Македонија?, прашува твитерџија.
Инаку, на дресовите како што велат од ФФМ е аплициран и рис. Голем дел од граѓаните во коментарите велат дека рисот е скоро невидлив.
За потсетување, дресот со изненадувачката боја вчера прв го престави претседателот Пендаровски, кога му го подари на Папата во Рим.
