Точно напладне бугарскиот претседател Румен Радев пристигна на скопскиот аеродром за да ја земе македонската делегација, предводена од претседателот Стево Пендаровски и заедно потоа да се упатат кон Рим на чествувањето на светите Кирил и Методиј.
Двајцата претседатели имаа куса средба на аеродромот, од која, како што рече Пендаровски во изјавата по неа, немало конкретен исход, туку била воведен разговор за престојните активности, но и за случувањата на релација Скопје-Софија изминатите денови.
Додаде дека во текот патувањето ќе имаат уште можности за разговор со Радев и за време на престојот и на враќање од Рим, а фокусот ќе биде на актуелните прашања во рамки на билатералните односи меѓу двете земји. 
Радев, пак, изрази благодарност до, како што кажа, неговиот колега и пријател Пендаровски за денешното гостопримство.
-Сакам да споделам дека заедничкото патување и оддавање почит на светите браќа Кирил и Методиј е прекрасен повод да го обновиме дијалогот на нашите две земји на највисоко ниво и да ја изразиме нашата заедничка волја за развој на нашите односи во духот на соработката, пријателството и добрососедството, истакна бугарскиот претседател во кусата изјава на скопскиот аеродром.
Двајцата претседатели утре ќе ја посетат базиликата „Санта Марија Маџоре“ и заеднички ќе им оддадат почит на светите браќа Кирил и Методиј. Тие ќе положат цвеќе пред пред спомен плочата во чест на сесловенските браќа.
