Против директорот на Центарот за култура во Кичево, Мазлам Османи, поднесена е кривична пријава откако во јавноста беше обелоденет случајот дека во оваа установа поставена е информативна табла, на која само на албански јазик е напишано Република Албанија и стои знамето на Албанија.
Пријавата против 44-годишниот функционер е поднесена поради сомнение за сторено кривично дело повреда на угледот на нашата држава.
Како што се наведува во официјалното соопштение на МВР, тој на 25 март како директор на Центарот за култура „Кочо Рацин“, дозволил во просториите на библиотеката да се постави табла каде се истакнати име и грб на странска држава со натпис на албански јазик. 
Притоа, воопшто не биле истакнати името, грбот или знамето на Македонија, како ни обележја на општина Кичево или на Министерство за култура.
Некои од вработените и посетителите во Центарот за култура „Кочо Рацин“ реагираа дека станува збор за провокација и за кршење на законите со оглед на тоа што таблата не е двојазична, односно оние што не го знаат албанскиот јазик, воопшто не може да се информираат за што станува збор.
Директорот Османи тогаш изјави дека станува збор за грешка, која ќе биде исправена и дека за тоа е надлежна Општината.
