Претседателот на државата ја повлече војската која беше распоредена на јужната и на северната граница, а која беше ангажирана за мигрантската криза.
Причина е тоа што ноќеска на полноќ истече рокот на одлуката за кризна состојба на овие две граници поврзана со мигрантската криза, а Собранието не донесе одлука за нејзино продолжување.
-Претседателот Стево Пендаровски, како врховен командант му нареди на Началникот на Генералштабот, Генерал-потполковник Васко Ѓурчиновски да постапи согласно со новонастанатата ситуација. Доколку Собранието донесе одлука за продолжување на кризната состојба поврзана со мигрантската криза на јужната и северната државна граница, врховниот командант на вооружените сили повторно ќе и нареди на Армијата да ги извршува досегашните задачи, соопштија од Кабинетот на претседателот на државата. 
Армијата во меѓувреме останува ангажирана на предвидените задачи поврзани со другата прогласена кризна состојба на целата територија на државата поради пандемијата предизвикана од ковид-19.
Одлуката за продолжување на кризната состојба поради мигрантската криза е една од оние кои се блокирани во Собранието. По договорот меѓу Заев и Мицкоски денеска се одржа седница се две точки – измените на Законот за попис и на Изборниот законик, чија потреба од донесување е изгласана со мнозиство гласови.
Одлуката за продолжување на кризната состојба не е на дневен ред на оваа седница.
