Македонската фудбалска репрезентација не успеа со победа да ги почне квалификациите Светското првенство во Катар во 2022 година. Четата на Горан Пандев беше на чекор до сензационален камбек кога губеше со 2:0, постигнувајќи два гола за две минути за 2:2, пред Јанис Хаџи, да не разочара и да донесе 3:2 победа на Романија.
Штета. Македонската репрезентација одигра добар натпревар.
Илија Несторовски прво имаше неверојатно двојно промашување на стартот на мечот, а потоа Флорин Танасе не „казни“ во 23. минута за Романците да поведат со 1:0. До крајот на полувремето свои неискористени шанси имаа и Енис Барди и Горан Пандев, за на стартот на второто полувреме во 50. минута, замената Валентин Михаила да постигне фантастичен гол од огромна далечина за 2:0. 
Тогаш следуваше драматичната завршница на мечот – Аријан Адеми прво во 82. минута намали на 2:1, пред веќе следната минута Енис Барди фантастично да му асистира на Александар Трајковски за израмнување. Но, наместо да одиме на голема победа, по една лоша реакција на целата наша одбрана, фудбалерот на Ренџерс, Хаџи успеа да го совлада Димитриевски за незаслужен пораз.
За момците на селекторот Игор Ангеловски нема време за одмор – за три дена во Скопје гостува Лихтенштајн.
ФОТО:ФФМ
