Шест наставници и пет ученици од средното уметничко училиште „Лазар Личеноски“ во Скопје се позитивни на корона вирус, а уште 20 ученици се во самоизолација поради контакт со заразените.
Поради ова, донесена е одлука наставата во целост да биде онлајн до 2 април, а не исклучува можност да трае и понатаму до завршување на овој нов бран на вирусот.
Професори од училиштето до медиумите реагираа дека директорот со самоволна, неоправдана и притивзаконска одлука го затворил за настава училиштето кое, како и средното музичко училиште, има дозвола за настава со физичко присуство за практичниот дел. 
Но, управата смета дека мора да има превентивна мерка, која предвидува онлајн настава, а наставниците кои не се заразени ќе предаваат од работното место.
Во ова училиште наставата беше онлајн, но учениците секој ден доаѓаа во училиште поради пракса. Училиштето има околу 290 ученици и 37 професори.
