Основното јавно обвинителство за гонење на организиран криминал и корупција поднесе обвинение против три лица од Куманово за „терористичка организација“ и „тероризам“.
Тројцата на возраст од 22, 26 и 28 години, според обвинението биле дел од терористичка ќелија со идеолошка матрица на познатата терористичка организација Исламска држава, која еден од нив ја формирал во 2019 година. Освен тројцата во неа членувале уште осум други лица за кои се спроведува истражна постапка од 28.12.2020 година.
Тие планирале едно или повеќе убиства, уништување на јавни објекти, објекти на инфраструктура и објекти за што купиле експлозив, огнено оружје, муниција, гранати, бомби и воена опрема. 
Тие изработувале импровизирани експлозивни направи и во два наврати од април до август лани ги испробувале во напуштениот објект на поранешниот Хотел „Ку-ба“ во близина на село Проевце, а кај местото Менкова Колиба во близина на Куманово пукале со ракетен фрлач.
Тие веќе се притвор откако беа уапсени лани на крајот на август во антитерористичка акција на МВР и Агенцијата за национална безбедност и Обвинителството бара таа мерка да им се продолжи.
