„Бетовен: Редефиниција“ е насловот на концертот што ќе се одржи вечерва во Филхармонија со почеток во 20 часот. Суштинската енергија е секако во рацете на оркестарот на Филхармонија под диригентската палка на маестро Емил Табаков од Бугарија, додека солистичката улога е на виолинистот Јонијан Илијас Кадеша.
Во концертната програма предвидени се „Варијации на тема од Хајдн“, опус 56 од Јоханес Брамс и Концерт за виолина и оркестарот во Де-дур, опус 61 од Лудвиг ван Бетовен. Последниот премиерно бил изведен во Виена во 1806 година. Ова е единствениот виолински концерт на Бетовен и едно од неговите најлирски дела.
Маестро Емил Табаков е роден 1947 година во Бугарија. Табаков се смета за еден од најзначајните диригенти на овие простори. Има настапувано како гостин-диригент во Австралија, Австрија, Англија, Германија, Данска, Италија, Израел, Канада, Јапонија, Јужна Кореја, Романија, Русија, САД, Сингапур, Холандија и Шведска. 
Јонијан Илијас Кадеша има грчко-албански корени, а живее во Берлин. Неговата изведба се карактеризира со стилска посветеност и егзактна артикулација во интерпретацијата на дела од сите музички епохи. Кадеша секогаш трага по имагинацијата на звукот, постојано барајќи нови звучни хоризонти.
Напишан е во еден од неговите најкреативни периоди, кога создал многу значајни дела. Му го нарачал виолинистот Франц Клеменет, кој сакал драматично дело за неговиот следен концерт. Бетовен го завршил за кратко време, непосредно пред концертот.
