Возење со мобилен телефон во рака е незаобиколна навика на многумина скопски возачи. Тоа го потврдуваат и секојдневните полициски контроли. Нема ден, десетина возачи да не бидат санкционирани поради тој сообраќаен прекршок.
Така беше и во изминативе денови: вчера беа казнети седум возачи, завчера 24, а во понеделникот 18 возачи… Бројките се големи, а само може да се претпостави колкумина не биле фатени од полицијата, а си пишувале СМС пораки додека возат или имале „итен“ разговор.
Значи, и покрај казнувањата дел од возачите од оваа лоша навика никако не се откажуваат. А со тоа се загрозува и сопствената и безбедноста на другите учесници во сообраќајот. 
Полицијата очигледно мора да биде поревносна во сузбивање на овој тип на прекршоци. Во спротивно не ни преостанува ништо друго освен при полагањето за возачка да се воведе и проверка на вештините со волан и мобилка во рака.
Да, знаеме дека во Скопје има и многумина кои немаат возачка, а возат низ градов. Тоа е друга тема.
