Во Галеријата МКЦ од вчера вечер се изложени сликарските дела на Трајче Чатмов. Се работи за ликовните композиции изложени под името „Интимно понирање“, за кои Анита Бошкова Доковска ќе рече дека се дела што лесно остваруваат директна комуникација со набљудувачот, карактеристични по својата едноставност и читливост на ликовниот јазик.
-Неговите слики претставуваат интимни медитации за животот и светот што нѐ опкружува, за егзистирањето во него и доживувањето/чувствувањето на истиот тој свет преку сите сетила. Фигуративните композиции на луѓе, бикови, змејови, имагинарни и митолошки суштества и нивната заемна интеракција ги носат трагите на енформелскиот израз и експресионистичката реторика, ликовен ракопис, кој на Чатмов му е елабориран и близок, нагласува таа.
Инаку во биографијата на Трајче Чатмов стои дека е роден 1971 година во Скопје. Дипломира на Факултетот за ликовни уметности во класа на професор Рубенс Корубин. Магистрира на истиот факултет под менторство на професор Родољуб Анастасов. Покрај сликарството се занимава и со фотографија, анимиран филм и документарен филм, за што има добиено неколку награди во 1997/8 (најдобра камера и најдобра режија за кратокиот документарен филм „Времиња“). 
