Сообраќајните незгоди не се случајни, туку се предизвикани од невнимателно и неодговорно учество во сообраќајот, се наведува во соопштението на Републички совет за безбедност во сообраќајот на патиштата по повод 15 ноември, Светски ден на сеќавање на жртвите од сообраќајните незгоди.
Во апелот се укажува дека сообраќајните незгоди, за жал, се сериозен проблем на сите современи општества. Трогателните слики со смрт и крв на патиштата, кои секојдневно се случуваат на патиштата ширум светот, се тешки и мачни за гледање, но уште потешко е директно да се соочите со нив и со нивните последици.
За жал, црната светска и домашна статистика и понатаму покажува дека сообраќајните незгоди се причина за голем број на загубени човечки животи, голем број на загинати лица и уште поголем број на повредени лица со трајни телесни повреди, уништени семејства и огромни материјални загуби. 
–Според СЗО, годишно, во светот 1,3 милиони луѓе го губат животот во сообраќајни незгоди, а 20 до 50 милиони лица се повредени. Тоа значи дека над 3.500 лица умираат дневно, како последица од сообраќајни незгоди, односно на секои 24 секунди, едно лице, – нечие дете, брат, сестра, родител, роднина, пријател…. го губи животот во сообраќајна незгода. Според статистиката, во 2019 година , во Македонија, 132 лица го загубија животот во сообраќајни незгоди, а 5.164 лица се повредени, се потенцира во обраќањето.
РСБСП портенцира дека е потребно да се каже стоп за смртта на патишта.
–Сите сме потенцијални жртви! Многу човечки судбини денес ќе беа различни, многу семејства кои денес се обвиткани во црно, ќе беа посреќни и повесели, многу детски или родителски солзи немаше да се пролеат, доколку сите учесници во сообраќајот покажат повисоко ниво на свест, совест, дисциплина и одговорност во сообраќајот. Да ги почитуваме сообраќајните правила и прописи! Покажи грижа! Разбуди ја свеста! Вози совесно и одговорно!, се наведува во апелот.
