Во мандатот на претходниот скопски градоначалник Петре Шилегов долгот на Градот Скопје е зголемен за трипати во однос на неговиот претходник. Ова денеска на брифинг со новинарите го соопшти новата скопска градоначалничка Данела Арсовска која додаде дека со тоа градот, практично, веќе не може да се задолжува за нови капитални проекти.
-Претходното градско раководство преку нетранспарентни постапки за јавни набавки, кредити и други трошоци направило долг во градот од повеќе од 50 милиони евра. Не сакам сега да објаснувам како е направен тој долг за да не шпекулираме со бројки тука, ќе ги добиете целосните извештаи од финансиската анализа во кои се гледаат причините за ова огромно задолжување на градот, рече Арсовска.
Таа рече дека нема да го продолжи градењето на новиот мост во Аеродром, затоа што имало голем број нерешени имотно-правни односи. Причина е што Шилегов почнал да го гради мостот, за тоа потрошил пари од граѓаните, а не ги решил големиот број имотно-правни односи. 
-Нема да се заврши, ќе биде мост за ловење риба. Ќе биде нешто што нема никаков ефект и бенефит за граѓаните. Постапката за да се заврши тој мост ќе трае десетина години. Ние ќе почнеме да ги решаваме, но кога ќе ги решиме е прашање на време, рече Арсовска додавајќи дека иста е ситуацијата и со мостот Љубљанска во Карпош 4.
Од друга страна Арсовска најави дека се работи на реорганизација на ЈСП и дека за две години целосно ќе се реализира проектот за бесплатен јавен превоз за граѓаните.
– Се работи на програмата што ја имавме зацртано, односно се преземаат првите чекори од етапното воведување бесплатен автобуски превоз. Ревизијата во ЈСП Скопје е започната, се детектираат сите слабости во работењето на ова претпријатие. Целта е најпрвин, претпријатието да излезе од долговите, второ – да се овозможи да се воведе бесплатен превоз, првично на оние категории на кои што им беше ускратено ова право и трето – изнаоѓање начини за детектирање на финансиски средства преку донатори за набавка на прва транша на автобуси, а понатаму ќе видиме како ќе биде финансирањето, нагласи градоначалничката Арсовска.
