Можеме да ви кажеме дека имаме напрадок, следуваат консултации во нашите партии, изјави вечерва лидерот на Алтернатива Африм Гаши по средбата со премиерот Зоран Заев.
-На средбата е констатиран евидентен напредок во усогласувањето на ставовите околу дополнувањето на содржинскиот дел на програмата на Владата, а разменети се идеи и видувања од двете страни за споделување на одговорностите на највисоко ниво во институциите на централната власт, соопштија од владината прес-служба.
Понатаму се додава дека разговорите продолжуваат водени од аспирациите за европската агенда на државата и од потребата за испраќање јасни пораки кон граѓаните и кон ЕУ за посветеноста во европеизирањето на државата, за унапредувањето на економскиот стандард и квалитетот на живот на граѓаните. 
-Се очекува до крајот на оваа недела да се остварат потребните консултации низ партиите и да се обезбеди потребното усогласување со цел постигнување договор за можна заедничка Влада која ќе се посвети на предизвиците кои доаѓаат од пандемијата и глобалната енергетска криза и која без задршка ќе ги остварува зацртаните стратешки цели, се вели во соопштението.
Четиричасовната средба на Гаши и Заев, што се одржа во Клубот на пратениците, беше продолжение на преговорите за вклучување на Алтернатива во Владата и парламентарното мнозинство.
Ова е трета средба на Заев и Гаши. И од претходните две лидерите излегуваа со слични изјави. Минатата средба беше поконкретна единствено со тоа што Алтернатива јасно кажа дека е за влез во Владата, но дека допрва ќе се договара платформата на која ќе се базира таа соработка и кадровските решенија.
