На речиси сите мерни места во државава, освен Гевгелија вчера се надминати среднодневните концентрации на ПМ 10 честичките, информира Министерството за животна средина и просторно планирање.
Надминување има дури и на мерното место во Лазарополе, каде во вообичаени услови нема такво нешто.
Од Министерството сметаат дека причина е движење на топлата воздушна маса која носи прекугранична прашина – се претпоставува пустински ветер. 
За високите вредности на ПМ 10 честичките кај Ректорат и Миладиновци, Министерството смета дека е резултат на прекинот на електрична енергија при што настанал прекин во мерењата на сите параметри за квалитет на воздух вклучувајќи ги и мерењата на концентрацијата на ПМ 10 честичките.
Односно, објаснувањето е дека по доаѓањето на електричната енергија мерните инструменти се рестартираат, а појавените високи вредности на измерени концентрации на суспендираните ПМ честички се случуваат поради процесот на стабилизација на инструментот по неговото повторно ставање во функција и се невалидни.
Но, сепак, ќе следат консултации со Државниот инспекторат за животна средина за проверка на евентуално други можни извори на загадување.
