Српските граѓани од 15 јуни до 15 август ќе бидат ослободени од патарини во земјава во знак на благодарност за донациите во вакцини, соопшти денеска и официјално министерот за здравство Венко Филипче во Белград на прес-конференцијата со српскиот министер за здравство Златибор Лончар.
Нешто помалку од 15.000 македонски граѓани досега се вакцинирале против ковид во Србија. За сите овие лица останува можноста да ја добијат и втората доза во Србија, на истото место каде што се вакцинирале и првично, или во договор со нашите власти, нивните втори дози да се достават во земјава и тие тука да бидат вакцинирани.
Српскиот министер, исто така, упати апел до македонските државјани што не живеат таму, немаат бизнис, ниту друг вид регулиран престој во Србија, закажувањето за вакцинирање во Србија да го прават исклучиво преку интернет-страницата Е-управа и да не доаѓаат без закажан термин на пунктовите за вакцинација. 
Тој рече дека без пријава граѓаните ќе можат да се вакцинираат само ако повторно има нови акции и повици за вакцинирање без термини.
