Лидерот на ВМРО-ДПМНЕ, Христијан Мицкоски со писмо до амбасадорите во Македонија ургира пописот да биде одложен за септември, а локалните избори за ноември. Тој писмото го напишал на Инфективната клиника, каде што е хоспитализиран поради ковид-19.
Како причини за одложувањето ја наведува лошата епидемиолошка состојба во земјава, и немањето вакцини, при што смета дека теренскиот попис може да го загрози здравјето на населението.
Тој предлага пописот, наместо во април, да биде одложен за септември, а локалните избори, наместо до 17 октомври, да се одржат во првата половина на ноември. 
-Јас не се сомневам во потребата од кредибилен попис, но во овој момент не е време за него. Ние мора да сме фокусирани пред сѐ на борбата против здравствените предизвици што се пред нас. Откако ќе се надмине здравствената криза, ние можеме повторно да се насочиме на пописот, се вели во писмото.
Одложување на изборите вчера предложи и претседателот на ДИК, Александар Даштевски, но поради тоа што сѐ уште не е набавена опремата за скенирање отпечатоци од прст.
Директорот на Државниот завод за статистика Апостол Симовски изјави денеска дека за одложување на пописот може да се размислува само ако тоа го препорача Комисијата за заразни болести. Се дотогаш пописот останува да започне на 1 април.
