Редовен и изборен конгрес во ноември годинава ќе одржи најголемата опозициска партија, реши соноќа Централниот комитет на ВМРО-ДПМНЕ. Конгресот на опозициската партија би се одржал веднаш по завршувањето на локалните избори во земјава, што треба да се одржат наесен. Тоа е период во кој изминува и четиригодишниот мандат на актуелниот лидер на партијата Христијан Мицкоски.
Стефан Андоновски, члена на Извршниот комитет на партијата по седницата изјави дека е потврдено отфрлањето на барањето на Иницијативниот одбор за одржување на вонреден конгрес на оваа партија на 28 март.
–Централниот комитет за ваква иницијатива заседаваше уште пред неколку месеци и едногласно донесе одлука за таа да биде отфрлена. И согласно со статутарните овластувања кои ги има и членот 29, став 4 од Статутот на ВМРО-ДПМНЕ. Централниот комитет и овој пат едногласно се задржа на принципиелно почитување на Статутот и статутарните принципи, рече Андоновски. 
Тој рече дека следува период на прочистување на партијата.
–Ова е добра прилика за прочистување на редовите на ВМРО-ДПМНЕ, последно прочитување помеѓу актуелното раководство, новата енергија и поранешните функционери кои се предводени од Зоран Заев. Би сакал да истакнам дека ние за наш противник го имаме Зоран Заев и продолжуваме кон рушење на хибридниот режим во Република Македонија и сите граѓани ни се добредојдени во оваа борба и во оваа поддршка и се надевам дека се поголем број ќе ни се приклучуваат, изјави Андоновски по седницата.
Инаку, во однос на пописот, ЦК на ВМРО-ДПМНЕ заклучил дека е тема што се злоупотребува од власта за политичка пресметка и се користи како „димна завеса“, за да се одвлече вниманието „од обидот за фалсификат кој се прави во позадина“, како и од другите теми кои ги загрижуваат граѓаните. ЦК на ВМРО-ДПМНЕ смета дека одбивањето на иницијативата за собирање граѓански потписи за носење на закон за поништување на Законот за попис, преставува чекор во кој се гледа стравот на власта од соочување со народот.
