Претпријатието за згрижување на кучиња скитници „Лајка“ одлучи да интервенира со прва помош, нега, храна и заловување на коњи кои се напуштени и изнемоштени. Се поголем е бројот на коњи кои се злоупотребени па оставени на милост и немилост на времето и просторот, па ги среќаваме како сами шетаат по улиците. А не ретко и умираат.
Идејата на „Лајка“ е несомнено добра, но примарната цел на нејзиното постоење се кучињата скитници – чии што број не се намалува, напротив. Секојдневно има луѓе кои пријавуваат дека се каснати од куче скитник. Надлежните ветуваа дека ова ќе се реши кога ќе се отвори „Лајка“ но скопјани тврдат дека подобрување нема.
Дополнително, грижата за коњите ќе го оттргне вниманието на претпријатието од неговата клучна мисија. За коњите, пак треба да се грижат пред се други надлежни, но и да се санкционираат т.н. сопственици кои се изживуваат со нив: ги злоупотребуваат како товарно возило, не ги хранат, ги тепаат и оставаат каде стигнат. Има земји во кои овие животни се сериозно заштитени, па ваквите случки се казниви и со затвор. Истовремено, секој човек не може да си дозволи да поседува коњ, барем не во овие земји – исклучително е скап и за купување и за одржување. 
Изгледа само во земји како нашата злоупотребувачите на коњи можат да си набават кога сакаат и при тоа да не водат грижа за нив. Во исто време нема ни кој да ги казни, па грациозните животни завршуваат трагично. Зошто едноставно не почне да се санкционира?
