Пуштен е во употреба пешачкиот мост меѓу Камениот мост и мостот Гоце Делчев кој ќе ги поврзува еврејското маало со сквер Јадран и градскиот плоштад, објави скопскиот градоначалник Петре Шилегов на својот профил на социјалната мрежа Фејсбук
Се работи за мостот кој претходната градска и централна власт го намени за изградба на панорамско тркало. Но, новите градски и државни власти во 2017 година се откажаа од проектот на претходната власт на мостот да се направи панорамското тркало, и се реши мостот да се адаптира во пешачки. За да не пропаднат вложените десет милиони евра, од предвидените 20 милиони, и да не се потрошат дополнителните 3,1 милион евра за негово уривање, беше донесена одлука мостот да се заврши за да сепак биде од полза за граѓаните.
На новиот мост, на неговите носечки сајли и столбови, е поставено и осветлување. Дел од скопјани забележаа дека Камениот мост, кој е симболот на градот, е потонат во темница и апелираа и тој да биде осветлен. 
