Тешка сообраќајна несреќа со смртни последици во охридско. Имено, На регионалниот пат Охрид – Св. Наум, на крстосницата за комплексот „Инекс“, синоќа околу 01.40 часот по полноќ се случила сообраќајна незгода во која едно лице починало и има неколкумина тешко повредени.
Од МВР информираат дека во сообраќајката учествувале автомобил „Цитроен Ц3“, со битолска регистрација, управуван од 27-годишен битолчанец, „Голф“ со охридска регистрација, управуван од 23-годишник, од охридското село Лескоец и „Фолксваген пасат“, со прилепска регистрација, управуван од 26-годишен возач од прилепското село Мало Коњаре.
Од здобиените тешки повреди, во болницата „Св.Еразмо“ починал 27-годишникот од Битола. Со тешки повреди се здобиле и сопатници во неговото возило: лица на возраст од 27 и 23 години од Битола и Струга. Тие биле примени во комплексот клиники „Мајка Тереза“ во Скопје. 
Тешко повредено е уште едно лице од Битола, но тоа е задржано во болницата „Св.Еразмо“ во Охрид. Таму била згрижена и сопатничка од истото возило, 25-годишна скопјанка, која се здобила со телесни повреди.
Во истата болница за укажување на лекарска помош е пренесена и 23-годишна охриѓанка, сопатник во возилото „голф“, додека по укажана лекарска помош, на домашно лекување се пуштени возачот на „голфот“ и сопатник од Охрид.
На местото на незгодата увид извршиле Јавен обвинител, судски вештак и полициски екипи.
