Во „Дрисла“ не се согорува опасен отпад без дозвола, тврдат од Град Скопје.
Оттаму објаснуваат дека откако „Дрисла“ се врати во надлежност на Градот, таа прераснала во санитарна депонија, каде се применуваат современи технологии за управување со отпадот, а целокупниот нејзин економски потенцијал е ставен исклучиво во служба на граѓаните.
-Набавен е нов стерилизатор за третман на медицински отпад од познатата италијанска марка ЦИСА, што е иновативен систем целосно автоматизиран со висока технологија и квалитет. Со тоа се стави крај на неодговорното и несовесно постапување со медицинскиот отпад, односно неговата несоодветна обработка, што потоа завршуваше на „Дрисла“ како обичен отпад, што претставуваше потенцијална опасност за животната средина и за здравјето на луѓето, велат од Градот. 
Освен медицински отпад, кој се третира во согласност со предвидените процедури, во депонијата не се согорува друг вид опасен отпад без дозвола.
ЈП „Дрисла“ постапува по забелешките на Државниот инспекторат за заштита на животната средина и до надлежното министерство има поднесено барање за скратување на бараните шифри за опасен отпад, додаваат од Град Скопје.
