ОЈО итно да покрене истрага и да утврди одговорност за сите институции кои биле запознаени со случајот со увозот на опасно масло, побара денеска партијата „Левица“. Во партиското соопштение се наведува дека објавената сторија на ИРЛ, за увоз на опасно масло, кое е забрането во ЕУ, јасно покажа дека за приватниот капитал нема граници, ниту принципи, кога е во прашање максимизирање на профитот!
Левица наведува дека во изминативе години, додека годишно над 3.000 животи беа жртви на загадениот воздух, социјал-демократската власт дозволувала увоз на токсично масло, под лажен назив “масло за горење”, преку анонимна фирма од Кичево.
-Македонија со Владата на СДСМ стана депонија на отпад кој не може да се продаде во ЕУ, а алчната желба за профит на функционерите на СДСМ дури и во смртноста од загаден воздух гледаат можност за заработка. Покрај Брако, најголем увезувач на токсичното масло е поранешно Фени Индустри на актуелниот градоначалник Митко Јанчев, кое е познато меѓу Кавадарчани по неговите оџаци на смртта. За скандал од вакви размери, каде директно е доведено во прашање животот на граѓаните, поранешниот вицепремиер Кочо Анѓушев уште вчера мораше да биде повикан пред истражните органи, наведува оваа опозициска партија. 
Освен ова, Левица бара ОЈО итно да покрене истрага и да утврди одговорност за сите институции кои биле запознаени со случајот и ништо не преземале.
-Пред се, мора да има кривична одговорност од поранешниот директор на Царинската управа – Ѓоко Танаскоски, во чие раководење се реализирал скандалозниот увоз. Дополнително, актуелниот директор Горан Сугаревски мора веднаш и неодложно да ги преземе сите чекори за прекин на увозот на ваквото опасно масло. Со секој изминат ден, животот на граѓаните се доведува во опасност и Сугаревски ќе се смета за соучесник во ваквиот криминал, за кој ќе биде гонет кога институциите ќе се ослободат од заробеноста на хибридниот режим, сметаат од Левица.
