Граѓаните скоро и да не добиваат одговори од општинските власти како се трошат парите собрани преку даноци. Едноставно на градоначалниците им стана навика да си тераат онака како што замислиле, без многу да се објаснуваат со граѓаните.
Општина Гази Баба одвојува 14 милиони денари за привремени вработувања, обвинуваат советници на ВМРО ДПМНЕ. Ова се случува на неколку месеци пред локалните избори, а според опозициските советници во општината, е недозволиво заради пандемијата и економската криза.
-Повторно недомаќинско трошење на народните пари од страна на градоначалникот Борис Георгиевски. 14 милиони денари за привремени вработувања во време на пандемија!Нема средства за капитални инвестиции, гасификација, водовод, фекални канализации, градинки, училишта, игралишта, катни гаражи и тн.., но затоа има за партиски вработувања. Ни тронка совест да се немало, обвинува Бобан Стефковски, претседател на ВМРО ДПМНЕ ОК Гази Баба. 
Два дена по ваквите обвинувања градоначалникот уште нема објаснето што се случува, и зошто токму сега се неопходни ваквите вработувања. За кои позиции се бараат работници? Зошто токму сега на само неколку месеци пред локалните избори? Дали се партиски вработувања или реални потреби? Има ли анализа направено општината, и кога, за тоа каков профил на луѓе и се неопходни?
Градоначалникот мора да одговори на сите прашања за да ги тргне сомнежите на граѓаните, во спротивно дилемите за партиско-политички позадини на вработувањата нема да исчезнат.
