Од утре напладне до понеделник до 6 часот наутро во Србија се воведува викенд-забрана за работа на кафеани и трговски центри и во градовите и во скијачките центри, а ќе бидат отворени само продавниците за храна, аптеките и бензиските пумпи.
Ваквата одлука на Кризниот штаб е поради порастот на новозаразени во земјата на 3 до 4 илјади дневно изминативе недели.
Од понеделник средните училишта ќе се префрлат на онлајн часови, но останатите дејности се враќаат на нормална работа како и претходно. 
Претходните денови, главниот епидемиолог Предраг Кон рече дека епидемиолошката состојба во Белград е катастрофална и дека ќе бара затворање на сите кафулиња и ресторани најмалку седум дена, а лекарите од Кризниот штаб побараа дури и полициски час.
Кон призна дека мерките донесени денеска ќе имаат ефект, но не доволно.
Следниот состанок на Кризниот Штаб е во вторник.
Но, прашањето кај нас е, дали ваквите викенд-мерки во Србија може да ги натераат тамошните граѓани да се упатат кон југ, кон нашата земја, имајќи предвид дека за влез меѓу земјите не е потребен ПЦР тест.
