Економијата е во рецесија, за 10 месеци 55 илјади луѓе останаа без работа поради корона кризата, а градоначалникот Шилегов вработува 135 партиски војници во градската администрација, обвини денеска Советничката група на ВМРО-ДПМНЕ во Град Скопје.
Од ова опозициска партија наведуваат дека владеачкото мнозинство во Советот на Град Скопје и Петре Шилегов денес донесе одлука за вработување на 135 нови партиски вработувања на определено време во градот Скопје, за кои советничката група на ВМРО-ДПМНЕ и Коалицијата гласаше против.
–Меѓу листата на работни места која се отвора е и за дополнителен возач на Шилегов затоа што претходно вработениот е унапреден во раководител на одделение во друго градско претпријатие. Наместо стручна администрација Градот Скопје добива партиска администрација. Пред изборите Шилегов и Зоран Заев ветуваа намалување на градската администрација за 20 проценти, а сега дополнително ја превработуваат со нови 135 партиски војници, се наведува во соопштението. 
Во него се додава дека градоначалникот Петре Шилегов освен консултант е и главен вработувач на партиски војници.
–Нема објаснување што ќе работат и каде ќе им се најде простор на овие ново вработени. Кога граѓаните на Скопје се незадоволниза некој нерешен проблем, треба да знаат дека нема пари поради тоа што Шилегов ги дава на партиски вработени, се наведува во соопштението.
