Се и сешто крадел 21-годишен скопјанец против кого е поднесено обвинение за пет кражби сторени во октомври годинава од страна на Основно јавно обвинителство – Скопје до надлежниот суд.
–Обвинетиот на 17 октомври, насилно провалил во просториите на невладина организација на улица „Вашингтонска“, од каде одзел 28 таблети, еден лаптоп компјутер, една панелка за греење, две греалки, електричен бокал и три пакети со прехранбени производи, во вкупна вредност од 232.200 денари. Во временски период меѓу 20 и 22 октомври, насилно отворајќи го прозорецот од бањата, провалил во куќа на еден оштетен на улица „Црноок“ и одзел четири теписи, 15 литри зејтин и еден фен за коса, во вкупна вредност од 27.400 денари, се наведува во информацијата.
ОЈО наведува дека обвинетиот на 28 октомври, на сличен начин, обвинетиот влегол во куќа на улица „Вашингтонска“ од каде одзел телевизор вреден 15.000 денари. На 30 октомври од друга куќа на истата улица одзел таблет – смарт пад, вреден 6.000 денари и избегал. 
–Обвинетиот на 3 ноември, го искористил невниманието на еден оштетен кој бил во фризерски салон на улицата „Индира Ганди“, па од дворот на фризерницата му го украл електричниот тротинет вреден 30.000 денари, наведува ОЈО Скопје.
Надлежниот јавен обвинител до Основниот кривичен суд Скопје доставил предлог за продолжување на претходно определената мерка притвор за обвинетиот.
