Синоќешната победа над Косово го растрча по теренот селекторот на фудбалската репрезентација на Македонија, Игор Ангеловски. Со знаме во раката тој прославуваше со македонските фудбалери кои со добра игра, упорност и ладни глави ја донесоа Македонија во финалето на плеј-офот на Лигата на нациите.
Потоа, селекторот Ангеловски потсети: „најважниот меч за оваа екипа е против Грузија во ноември“.
– Сега нека се радува Македонија, но од утре мора да се спуштиме на земја. Прво имаме меч со Естонија, а за еден месец играме со Грузија. До финалниот меч ќе бидат направени сите анализи. Би сакал за тогаш сите играчи да ги имам на располагање. Не сме голема репрезентација и секое отсуство може да биде проблем – изјави Ангеловски по синоќешниот меч. 
Тој вели дека оваа репрезентација создала победнички менталитет.
– Се враќавме против Италија и Словенија, а не загубивме глава по примениот гол. Тоа е заслуга и на фудбалерите и нивната работа во клубовите, бевме добро психолошки подготвени да се издигнеме и во ваква ситуација – изјави селекторот.
Изрази благодарност на сите за поддршката, но и за критиките.
– Сето тоа нè донесе до моментот да ја видиме Макеоднија после 30 години на едно европско првенство, вели Ангеловски.
Тој истакна и дека вчеравечер им недостасувале многу навивачите на арената „Тодор Проески“, но ќе сторат се за да ги израдуваат со пласман на Европското првенство.
