Три медицински сестри си дадоа отказ на Клиниката за инфективни болести. Се работи за главната и уште две други. Нивните писмени барања до директорката на клиниката, односно до управата. Во барањето на главната сестра, инаку според датумот поднесено на 21 септември, е наведена и причината за отказот или како што таа вели заради „непочитување и деградирање на профилот медицинска сестра“.
-Барам да ми го прифатите отказот од работа, со претходна најава од месец дена, во кој период ќе го користам годишниот одмор од 2019 и 2020 година. Причините да ја напуштам клиниката по 28 години професионална работа се многубројни, но би навела само една: Непочитување и деградирање на профилот медицинска сестра, како една од најважната алка во медицинскиот тим – наведува главната медицинска сестра во нејзиното барање до раководството на Инфективната клиника.
Двете медицински сестри пак отказите ги дале завчера, на 28 септември, но кај нив не стојат причини туку конкретно е наведено дека до истекот на законските 30 дена отказен рок имаат денови од одмор за да користат. Станува збор за една медицинска сестра на Оддлението за Ургентна инфектологија, а другата од Одделението за неуроинфекции.
Се очекува во текот на денот објаснување од раководството на инфективната клиника, но и од министерот за здравство, зошто во време кога се очекува влошување на ковид-состојбата да се намалува на овој начин клучниот персонал на клиниката.
