Имаме добра основа за отстранување на пречките за отворање на преговорите со ЕУ со решение кое не задира во македонските идентитетски прашања и за кое сме убедени дека е прифатливо и за круцијалните позиции на Бугарија, оцени премиерот Зоран Заев за предлог – решението на министерот за надворешни работи на Португалија Аугусто Сантош Силва и еврокомесарот за соседска политика Оливер Вархеји.
-За нас, особено важно е што со ова предлог-решение никако не се допира и не се навлегува во нашите македонски идентитетски прашања, со што нашата круцијална позиција е задоволена, а силно сме убедени дека предлогот е добра основа и за круцијалните позиции на Бугарија, изјави Заев по состанокот со Силва и Вархеји.
– Нашата цел е во текот на нашето претседателство со Советот на ЕУ да добиеме одобрение од сите земји-членки на ЕУ и да ја започнеме преговарачката рамка со Македонија и Албанија и да ја одржиме првата меѓувладина конференција со двете земји, изјави португалскиот министер по средбата. 
Тој посочи дека за нив е важно да одржат политички консултации и тука во Скопје и да ги имаат предвид ставовите и интересите на Македонија.
Силва и Вархеји во Скопје дојдоа од Софија каде го однесоа предлогот. Бугарскиот министер за надворешни работи Светлан Стоев кажа дека во бугарската политика кон Македонија има целосен континуитет и не може да се очекува промена, но целта е да се создадат неопходните услови за продолжување на дијалогот.
